Happy Hoagascht und di Hofa Buam

Seid wonn gibs iatz Happy Hoagascht?

Happy Hoagascht is im Februar 2009 von Stefan Schipflinger als Singer-Songwriter Projekt gegründet wordn, nochdem a sein erstn Song „di Woch is um“ gschriebn hod.

Warum hoast Happy Hoagascht Happy Hoagascht?

Auf oana Seitn woas wichtig, das im Künstlernom a internationaler Part, in dem Foi „Happy“ und a traditioneller Part, in dem Foi „Hoagascht“ zomgmischt werdn. Dadurch entsteht a Symbiose de Weitblick owa a Heimatverbundenheit vermuten losst.

Auf da ondan Seitn kunnt ma owa a behaupten, das des gonze a Produkt von intensiver geistiga Onanie is.

Mit wos kunnt ma Happy Hoagascht vergleichen?

Es gibt bestimmt Einflüße, wia zum Beispiel Bob Dylan oda a Fredl Fesl, a bissl Punk Rock und a wench Schürzenjäger. Owa da Künstler söwa ordnet si eigentlich in di „Innagebirgs Anti Folk“ Szene ein, spricht owa a von „Pinzgau Pop“.

Wonn spüd Happy Hoagascht beim Musikantenstadl?

Erst wenn da Hias zu seim dreißigsten Geburtstog live „übern Laurenziberg“ singt. Also nia.

(Anmerkung des Webgestalters: Erich Mathias Mayer, bekannt als „Hias“ bzw. „das Urviech der Nation“ war lange Zeit neben Karl Moik Moderator vom Musikantenstadl. Bedauerlicherweise verstarb er am 7. Juli 2007).

Wos hods eigentlich mit di „Hofa Buam“ auf sich?

Es woa Mai 2010, kunnt owa a Juni gwesn sein, wia a oida Freind von Happy Hoagascht bei eam ugruafn hod. Es woa da Robert Zimmermann, a bekonnta Liadamoacha aus Amerika und hod eam gfrog, ob a nit mit eam auf Tour gehn mecht. Voraussetzung woa, das a a eigene Band mitbringt. Iatz woa da Happy natürlich üwahappy und hod owa auf di gachn goa nit gwisst, wo a denn a Band hergriag. Wias da Zuafoi wü, geht a am gleichn Tog zan Hofa in Soifön, sitzt do oana und spüd Cajon und Tambourine. Hod an glei gfrog ob a einsteig. Da Noxei hoast „Muggi“ und hod glei jo gsog. Iatz woid as natürlcih genau wissn und is donn glei zan Hofa noch Zö gfoan. Schau her, steht oana doscht und spüd Saxophon. Der Loda hod übrigens „Floggi“ hoasn und woa glei recht begeistert (nochdem a eam zerscht zwoa Eiro in san Koffa einigschmissn hod).

Jo ,und seid dem hoassns wenns zom auftretn, Happy Hoagascht und di Hofa Buam, inzwischen scho di „legendären“ Hofa Buam.

Di Tour is donn übrigens platzt, weil irgendwer an Bertl sei Pferdl gstoin hod. Traurige Gschicht.

Wo griag i an Happy Hoagascht Starschnitt her?

Rennbahn Express oder oafoch söwa a Foto mochn.

Spüd Happy Hoagascht a bei Hochzeiten?

Grundsätzlich spüns gemeinsam owa a aloa üwareu, wo Leid sand, dia gean zuahean und a freid mit kloane Gschichtn ausm Lebn homb. Ausgenommen sand Beerdigungen sowie Hochzeiten von diversen Ex-FreundInnen.

Ku Happy Hoagascht so pinzgan wia mei Oma?

Defenitiv nit (ausser di Oma kimb aus Oklahoma, Bali oda Adis Abeba). Es gib imma wieda neue Wörter dia ma nua aus an nettn Gespräch erfoat. Deshoib a Tip: Nit dahoam huckn, aussi geh und mit die Leit redn. So kemmans zom und ma lernt fü neus fias Lebn und bleib in Übung beim pinzgarisch redn.

Hod Happy Hoagascht a persönliche Beziehung zu di Instrumente?

Auf alle Fälle. Jeds Instrument hod an eigenen Nom, so is die Stimmung fü familiärer. Di Gitarre hoast „Koriander“, des Didgeridoo „Darrell“, da Fotzhowi „Robert Allen“, di Querflöte „Nicola“, di Melodica „Walter“, des Saxophon „Claudia“ um nua a boa aufzuzählen. Also wias segs, a richtige Großfamilie.

Gibs bei Happy Hoagascht an großen Groupieandrang?

Durch di Tatsache, das a Star wia da Andreas Gabalier 90% der österreichischen 15-35 jährigen scho in seiner Taschen hod, und di 90% vo 35 bis Grob fest in Hansi Hinterseers Hand sand, bleib für Happy Hoagascht a gonz geringer weiblicher Prozentanteil – der hods owa dafür in Sachen Weitblick und Weltoffenheit sowie Auftreten gonz faustdick hinter di Ohren.

Mecht Happy Hoagascht amoi gonz Berühmt werdn und an Haufn Göd vadeana?

Da onzige Grund warum Happy Hoagascht Musi mocht is weils a Gaudi is und weil a gmerkt hod, das di Leid gfoid, von 0-99 Johr hods bis jetzt imma a super Feedback gebn. Des schenste im Lebn is nit Geld und Ruhm, sondern wenn ma von an ondan Menschen hört, das eam des gfoid wos du mochst und das ma weiter mochn soid.